Fidanët dhe të gjitha produktet bimore që importohen nga jashtë do të kontrollohen në pikat kufitare për të shmangur futjen në vend të parazitëve apo sëmundjeve të ndryshme bimore. Drejtori i Përgjithshëm i politikave të bujqësisë dhe sigurisë ushqimore në Ministrisë së Bujqësisë Irfan Tarelli thotë për Report TV se ndryshimet në ligjin e bimëve synojnë të shmangin përhapjen e sëmundjeve dhe dëmtimin e bimëve në vend.
Të gjitha bimët dhe produktet bimore që importohen nga jashtë, fillimisht do të kontrollohen në pikat kufitare nga AKU, me synim parandalimin e futjes në Shqipëri të sëmundjeve e parazitëve të ndryshëm. Kjo masë është parashikuar në ndryshimet e propozuara nga Ministria e Bujqësisë në ligjin për mbrojtjen e bimëve.
Synohet që monitorimi dhe kontrolli i sëmundjes dhe dëmtuesve për bimë të caktuara që importohen apo eksportohen të bëhen në mënyrën e duhur dhe të dokumentohen masat. Kemi parasysh që kur flasim për importet kontrolli i parë të bëhet në pikën kufitare dhe në raport me protokollet e përcaktuara të merren masat përkatëse. Po aq e rëndësishme është edhe se çfarë ndodh në nivel ferme, pra të minimizojmë të përhapjen e sëmundjeve”, u shpreh drejtori i politikave të bujqësisë dhe sigurisë ushqimore në ministrisë së Bujqësisë, Irfan Tarelli.
Një masë e tillë sipas drejtorit të përgjithshëm në ministrinë e Bujqësisë Irfan Tarelli është e rëndësishme edhe për produktet që ne eksportojmë pasi janë më të sigurta.
“Shqipëria është një vend që ka një dinamikë për importin e produkteve bujqësore për materialin mbjellës, por edhe për eksportin e tyre. Publiku është në dijeni që sasitë e eksporteve janë rritur në mënyrë të ndjeshme”, tha Tarelli.
Këto ndryshime ligjore që pritet të minimizojnë përhapjen e sëmundjeve tek bimët në vend, janë pozitive edhe për fermerët, thotë Tarelli.
“Përfituesi i drejtpërdrejtë është fermeri në këtë rast pasi sëmundja apo dëmtues shfaqen në moment kultivimi por jo vetëm dhe nëpërmjet përmirësimit të këtyre masave krijohet mundësia që fermeri të minimizojë dëmet dhe humbjet në nivel ferme”, u shpreh për Report TV Tarelli.
Projektligji me të gjitha këto ndryshime është depozituar në kuvend dhe pritet që të shqyrtohet në komisionet parlamentare.
Burimi: shqiptarja.com
